Also, wenn etz sogar bei Ernsgon de B 16 ausbaut werd, nachat kanntatn mia in Pfahofa doch wirklich endlich amoi unser Umgehungsstrass kriang. I woaß a net, wo do los is! Etz homma doch extra mitm Wolf an strammer CSU-Parteisoldatn, der außerdem no im Ministerium war, als Landrat g'wählt – und trotzdem geht do nix weida. Entweder hot der Wolf gor net so guade Kontakte nach Minga oder eam is des einfach wurscht mit der Umgehung, weil er ja Landrat is und net zuständig für de Stodt. Außerdem: Er und da Herker, de san ja net bloß politisch wia Feuer und Wasser, de meng se a sonst ungefähr so gern wia da Daschner und da "Mensch" Mayer. Do brauchst de natürlich net wundern, dass des mit dera Umgehung de nächstn zehn, zwanzg Jahr nix werd. I schatz, do werd da Schmuttermayr nachat zu Beginnn seiner neunten oder zehnten Stadtratsperiode de Umgehung eröffnen derfa. Oder vielleicht is ja bis dahin de FDP am Ruader, nachat werds koa Umgehungsstrass, sondern da Viktor-Kalupar-Tunnel. Do konnst etz übrigens amal wirklich song: De Liberalen hom unterirdische Ideen.